[dropcap]SAN ANTONIO[/dropcap] U nastavku finala plej ofa Zapadne konferencije američke profesionalne košarkaške lige (NBA) San Antonio je jutros po našem vremenu na svom terenu savladao Oklahomu sa 117:89 (32:32, 33:23, 29:19, 23:15) i poveo sa 3:2 u seriji u kojoj se igra do četiri dobijene utakmice.
Sa 22 koša i 12 skokova, za nešto manje od 30 minuta, veteran Tim Dankan bio je najzaslužniji za pobjedu San Antonija kojom je ovaj tim došao na korak od plasmana u veliko finale NBA lige.
Dankan je 154. put u karijeri, u utakmicama plej ofa, ostvario dvocifren učinak u dvije kategorije i potpuno se približio apsolutnom rekorderu Majklu Džordanu, koji je na 157 mečeva plej ofa imao “dabl-dabl” učinak.
Dankan je, takođe, 98. put u doigravanju za titulu postigao 20 ili više koševa, odnosno uhvatio 10 ili više lopti na jednoj utakmici, po čemu se odavno izdvojio od svih aktivnih igrača. Drugi na listi aktivnih košarkaša sa učinkom 20+ poena, odnosno 10+ skokova je Nijemac Dirk Novicki, koji je do tog ostvarenja došao na 64 meča.
Pored Dankana, velike zasluge za trijumf San Antonija idu i na adresu Argentinca Emanuela Ðinobilija, koji je utakmicu završio sa 19 poena i 6 asistencija.
U poraženoj Oklahomi bolji od ostalih bili su Kevin Durent i Rasel Vestbruk. Prvi je ubacio 25, a Vestbruk 21 koš.
Naredna utakmica igraće se u noći između subote i nedjelje, a domaćin je Oklahoma.
