[dropcap]MADRID[/dropcap] Fudbalski savez Španije (RFEF) želi da selektor Visente del Boske ostane na klupi nacionalnog tima, uprkos debaklu na Svjetskom prvenstvu u Brazilu, rekao je generalni sekretar Horhe Perez.
Branilac titule se oprostio od trofeja osvojenog prije četiri godine u Južnoj Africi, pošto je na startu takmičenja doživjelo poraze od Holandije (5:1) i Čilea (2:0) i na taj način izgubio šanse za prolaz u osminu finala.
“Bolje da pustimo da prođe vrijeme i mirno razgovaramo u Madridu. Kada je Del Boske potpisao ugovor, rekao je da će otići onog trenutka kada savez procijeni da je došlo vrijeme za rastanak. On nije nudio ostavku, a i da jeste, mi bismo je odbili i tražili da nastavi da radi. Svi u savezu su uz njega”, rekao je Perez za španski nacionalni radio.
Del Boskeu ugovor sa Španijom ističe 2016, nakon prvenstva Evrope u Francuskoj.
On je reprezentaciju preuzeo 2008. od Luisa Aragonesa. Predvodio je ekipu do titula prvaka svijeta 2010. i prvaka Evrope na šampionatu u Poljskoj i Ukrajini 2012.
